نشرة الاخبار

الاثنين، مارس 05، 2007

رسالة مركز النديم الى المهمومين بسمعة مصر


رجال الداخلية في دمياط ينتهكون القانون ويعذبون المواطنين ويدمرون المنازل ويأخذون الرهائن

جريمة جديدة تضاف إلى ملف ضباط شرطة دمياط ضحيتها هذه المرة أسرة المواطن فوزي حسن0
ففي يوم الثلاثاء الموافق 27 فبراير 2007 قامت طبيبة من مركز النديم ومحام من الجمعية المصرية مناهضة التعذيب بزيارة قرية السرو - لمتابعة أحوال أسرة السيد أبو العينين بعد أن قامت الشرطة مرة أخرى باقتحام منزله وتدمير ما كان تبقى فيه من أثاث لنجد جريمة أخرى في انتظارنا اقترفها رجال شرطة دمياط ضد السيد فوزي حسن (60 سنه، فران) وأبناءه حيث قامت الشرطة باحتجاز فوزي وأحد أبنائه لمدة 17 يوما تعرضوا خلالها للتعذيب بالكهرباء والضرب بالعصي واللكمات وبعد أن جردتهم من ملابسهم تماما0
هذا وقد سبق أن قامت الشرطة بتلفيق قضية سرقة لأحد أبناء فوزي لكن المحكمة برأته لأنه تمكن من إثبات أنه كان خارج مصر وقت اقتراف الجريمة التي اتهموه بها. منذ ذلك الوقت والشرطة تمر يوميا على منزل الأسرة، تكسر الأبواب والأثاث وتأمر الأسرة بعدم إصلاح الأبواب وتركها مفتوحة ليل نهار حتى يتمكن الضباط من الدخول والخروج متى يشاءون وهو ذات السيناريو الذي تعرضت له من قبل أسرة السيد أبو العينين0
وفي يوم 28 فبراير 2007 في الواحدة، وبعد ان كنا تركنا القرية، قامت قوات الشرطة بمهاجمة منزل الأسرة وتدمير مابقي من أثاث، وفي الواحدة وخمس وأربعون دقيقة من ظهر نفس اليوم قامت الشرطة بمهاجمة المخبز الذي يعمل به فوزي حسن وابنه وتم التعرض لهما بالضرب كما القي القبض على الابن: السيد فوزي حسن.. واحتجزته لمدة 24 ساعة وامرته ان يذهب يوميا لقسم الشرطة "في الثامنة مساء" علي الرغم انه لا توجد احكام بالمراقبة للمواطن المذكور.0
إننا نرفق مع هذه الرسالة نص شهادات أفراد الأسرة، نسوقها كما هي دون حذف أو تغيير، بما في ذلك الشتائم والألفاظ القذرة التي استخدمها رجال الشرطة مع الأسرة رجالا ونساء0
إن مركز النديم يحمل وزارة الداخلية المسئولية الكاملة عما حدث من أذى وضرر بالأسرة وعما يمكن أن يتعرض له السيد فوزي حسن من تعذيب على أيدي ضباط الشرطة، وهم:0
رؤساء المباحث: محمد البنا ومحمد سرحان
ومفتشي المباحث: محسن نجيب ومحمد العشماوي
ومعاوني المباحث: مصباح القصبي ومحمد شلبي
كما أن مركز النديم يناشد كافة المنظمات الحقوقية والمعنية بحقوق الإنسان التدخل العاجل وإرسال برقيات الاحتجاج إلى كل من
السيد وزير الداخلية: فاكس 7960682
سعادة المستشار النائب العام: فاكس 5757165
سعادة المحامي العام لدمياط: فاكس 335566/057
شهادات الأسرة
الأب فوزي حسن زبيدان: 0
من تلات شهور ابني رجع من ليبيا.. وهو قاعد على القهوة وقفت سيارة ميكروباس واتهجموا على الناس اللي في القهوة وشتموا ابني.. كانوا لابسين مدني.. وهو ما عرفش انهم حكومة فرد عليهم الشتيمة..0
خدوه على القسم وضربوه وكهربوه في ودانه وفي أعضاءه الذكورية وطلبوا منه يسمي نفسه باسم بنت، فرفض.0
بعد يومين رجع البيت عدمان.. خفنا من الحكومة وما بلغناش.. ابني قعد في السرير شهر كامل مش قادر يعمل أي حاجة.. أخدته بره البلد لحد ما يسترد صحته.. رجع لقي عليه قضية سرقة محل مويايلات بتاريخ سابق.. ستر ربنا انه في التاريخ ده كان في ليبيا.. قدمنا جواز السفر للمحكمة وطلع براءة.0
الضابط محمد البنا حاطه في دماغه وفضل وراه لحد ما هج.. وتعرضوا لأخوه عوض ومراته (قرية الشعرا) لحد ما هجوا هم كمان..0
بعدها ابني الصغير أحمد قاعد على القهوة مع أصحابه.. شافهم جايين عليه خاف منهم وجري وساب تليفونه.. جريوا وراه وضربوه بالنار.. الرصاصة جت في ايده.. أنا ما شفتوش وما أعرفض عامل ايه.. اهل البلد هم اللي بلغوني.. الواد هج وما أعرفش عنه حاجة.0
مدير مباحث المديرية قال لي يا معرس.. وقال لمراتي الحاجة بيت الله يا معرسة.. وأنا واقف في الفرن لقيت الحكومة اتلمت علي.. قالو مباحث التموين.. واحد سألني فين رخص الفرن.. قلت له مفيش رخص.. كانوا 3 عربيات شرطة مليانين.. أخدوني قسم راس البر أنا والعمال.. كان معاهم مدير المباحث 0
وأنا طالع سلم القسم زغدني وقال لي: شوال البانجو ده بتاع مين؟ قلت له: بانجو ايه يا باشا؟ سألني: ابنك عوض ساكن فين؟ قلت له: في الشعرا. سال: والسيد؟ قلت: في الشعرا0
قامت عربية تجيب عوض والسيد.. جابوا سيد وما لقوش عوض.. كسروا بيته قبل ما يمشوا..0
حطونا في التلاجة 17 يوم.. أنا والسيد.. أوضه متر في تلاته متر.. فيها ماسورة مفتوحة والمحبس في حجرة الضابط عشان لما يحب يفتح الميه ويغرق الأوضه يقدر يعمل كده من مكتبه..0
قعدنا طول المدة لا حد يشوفنا ولا نشوف حد.. جالنا محامين كتير ما سمحولهمش يشوفونا.. وما افرجوش عننا..0
في اليوم الـ 17 طلبنا السيد عشماوي (مفتش المباحث) الساعة 10 الصبح.. قعد يشتم فينا وقال اللي مش هيحيب ابنه هأعمل له قضية بانجو.. كنا لسه تبع مديرية الأمن.. بعتنا على الزرقا تاني يوم لإخلاء السبيل.. لقينا عشماوي قاعد في مكتب الضابط.. وقال: امشي انت والسيد هيطلع بكره.. وطلع تاني يوم..0
أول امبارح (25 فبراير 2007) جم تاني.. بالليل.. كنت لسه ما رجعتش من الشغل.. مراتي كلمتني: إلحقني، هأموت.. الحكومة جت وكسرت البيت وضربوني.. رجعت 12 بالليل لقيت البيت متبهدل.. رتبت البيت شويه.. سمعت أصوات بره.. عرفت إنها الحكومة.. فتحت لقيت أمين الشرطة حاطط ودنه وبيتصنت.. ونفس القوة معاهم البنا ومحمد بك سرحان رئيس مباحث مركز دمياط..0
دخلوا.. لقوا مراتي بتصلي.. بعد ما ختمت الصلاة البنا قال لها: حرما يا متناكة يا بنت الوسخة.. جالها أزمة قلب ووقعت على الأرض.. جه ابني ربيع يشوفها ويسعفها.. منعه الضابط وقال له: خليها تموت.. أنا عايزك تبص لأمك كده والمنظر ده ما تنساهوش.. وخلع باب البيت بعد ما كسره وقال: إياكم تركبوا الباب عشان احنا هنفضل رايحين جايين كل شويه!! 0
جرس التلفون المحمول رن في جيبي.. طلعته ولسه هأرد.. الخط فصل.. قال: مين على التليفون. قلت: ابني. شتمني وسبني وأخد التليفون وقال للسيد: آجي أي وقت، بالنهار بالليل، ألقاك في البيت، ما أشوفكش في الشارع. وقال لمراتي: ما تسيبيش البيت.. عشان لما آجي في أي وقت ألاقي حد يقابلنا وإلا هأكسر كل حاجة في البيت..0
ضربوا مرات ابني، عروسة وحامل في أول شهور الحمل
لما طلع النهار أخدت مراتي وعيالي ومرات ابني ومشينا من البلد وسبنا البيت أبوابه مفتوحة.. خفنا حتى نصلح الأبواب0

شهادة السيد:0
كنت شغال في الشعرا فران.. انا عندي عجز في كتفي الشمال ودراعي اليمين.. جم الفرن وطلبوا اني اروح معاهم.. قلت: فيه ايه؟.. قالوا: سؤالين وحنرجعك على طول.. في الطريق سألوني عن اخويا عوض وعن حسام السادات مكانهم فين.. قلت ما أعرفش.. وأنا فعلا ما اعرفش غير انهم هجوا من أذية الحكومة..0
رحت مركز عزبة اللحم بدمياط لقيت ابويا.. العقيد جمال سلامة هو اللي كان بيضرب بنفسه وأمناء الشرطة بيساعدوه.. كنا تقريبا يوم 19 يناير، بعد فرحي بأسبوعين.. ضرب وبهدله وشتيمه بألفاظ قذرة وبعدين تلفيق قضايا بانجو.. لقيت ابويا في التلاجة.. عذبونا بالكهرباء وضربونا بالعصي.. كانوا بيحطوا الكهربا في الودان وفي الأماكن الحساسة.. ده غير ضرب البونيات.. كانوا مقلعينا هدومنا خالص وهم بيضربونا.. بعد 17 أو 18 يوم خرجونا..0
بعدها كل شويه ييجوا يكسروا ويشتموا مراتي ويشتموني.. خلعوا الباب بعد ما كسروه وقال الضابط: الباب ما يتقفلش عشان كل شويه انا هآجي0
عايزن يحددوا اقامتي.. ممنوع أكون بره البيت من المغرب.. أعمل ايه؟ علي اقساط وجمعيات.. عاوزيني أسرق ولا اتاجر في المخدرات؟
ضربوا مراتي وهي حامل.. خايف يكون الحمل حصل له لحاجة.. وخايف اعمل أشعة أحسن يطلع الجنين مات.. أنا مش عارف هأقدر اخلف تاني ولا لأ؟

ليست هناك تعليقات: