نشرة الاخبار

الأحد، ديسمبر 19، 2010

ورينا عرض كتافك ... انحيازك مش بيهمنا

محمد منير

عمرك مرضت أو حد من عيالك مرض ومالقتش فلوس تعالجه .. تبقى انت مش منحاز لنا ...فيه شهر مر عليك من غير ما تستلف عشان تأكل عيالك .. تيقى انت مش منحاز لنا ... عمر لحست التراب وصعرت خدك للى يسوى ومايسواش عشان عيالك بس يعيشوا وما يموتوش من الجوع .. تبقى انت مش منحاز لنا ... عمرك حاسبت نصاب أو هباش أو هجام هجموا على بيوتنا وسرقوا احلامنا وقوتنا وقوت عيالنا .. تبقى انت مش منحاز لنا .. عمرك رقعت هدمة أو اشتريت جزمة مستعملة بغطا حلة أو كلت لقمة صدقة .. تبقى انت مش منحاز لنا .. فيه حبيب لك أو قريب أو صديق مات فطيس فى حريق نتيجة اهمال أو غرقان فى عبارة بتنقل فقرا هربانين من الجوع والهم او اتفحم جوة قطر درجة تلته مكدس بالغلابة اللى دايخين ورا لقمة العيش .. تبقى انت مش منحاز لنا ... عمرك شفت مصرى بيموت جنبك عشان ديانته مسيحى ولا مسلم تبقى انت مش منحاز لنا ..ورينا عرض كتافك انحيازك مش بيهمنا

ليست هناك تعليقات: